21.-22. august var medlemer frå Flora, Bremanger og Vågsøy Arbeidarparti samla til Kalvågsamling. Hovudtema var 45-minuttsregionen og aktuelle samarbeidsområde. Ein vedtok å sende ein uttale til fylkestingsgruppa i Sogn og Fjordane Arbeidarparti med oppmoding om støtte til Kystvegen:

Til

Sogn og Fjordane Arbeidarparti
v/ Fylkestingsgruppa

Oppmoding om støtte til Kystvegen og 45-minuttsregionen

Flora, Bremanger og Vågsøy Arbeidarparti set pris på engasjementet Sogn og Fjordane Arbeidarparti har vist for Kystvegen. Men vi ber om endå meir konkretisering og tydelegheit frå fylkestingsgruppa til Sogn og Fjordane Arbeidarparti når det gjeld støtte til realisering av Kystvegen og 45-minuttsregionen.

Lokallaga ser med uro på aukande arbeidsløyse og fråflytting langs kysten av Sogn og Fjordane. For å snu denne negative utviklinga er gode kommunikasjonar ein viktig nøkkel. Vi viser til prosjekt kysten som vart initiert av fylkesutvalet på starten av nittitalet. I forarbeidet til høyringsdokument frå juni 1991 vart det gjort framskrivingsprognosar frå 1990 til 2015. Faktiske tal i dag viser at vi har ei sterkare og meir negativ utvikling enn det her vart føresett, vi er faktisk 5-6 år tidligare ute i høve negativ folketalsutvikling.

Ved ei realisering av Kystvegen og 45-minuttsregionen vil ein få utvikla ein utvida bu- og arbeidsmarknadsregion i området samt skape betre mobilitet i næringslivet og legge til rette for utvikling av uforløyste næringspotensial.
Når ein ser på naboregionane våre i nord og sør, så har dei gode forbindelsar langs kysten, og også vekst i næringsliv og innbyggjartal. Vi viser elles til konklusjonane i rapporten ”Sluttrapport for etablering av 45-minuttsregionen”, som næringsutviklingsselskapa i Flora, Bremanger og Vågsøy har utarbeidd.

Det er positivt at stortingspolitikarar engasjerer seg for Kystvegen, men det er ikkje store ord frå dei som er avgjerande for om vegen vert bygd eller ikkje. Det som er relevant er kva fylkespolitikarane i dei enkelte partia meiner, sidan det er dei som skal prioritere løyvingane frå fylket i handlingsprogrammet for fylkesvegnettet.

Arbeidarpartiet har eit slagord no ved valet som seier at ”alle skal med”, vi som bur på kysten ynskjer òg å vere med og få dei same moglegheitene som andre kystregionar i Noreg.

Vi ber derfor om følgjande:

• At fylkestingsgruppa til Sogn og Fjordane Arbeidarparti gir støtte til raskast mogleg realisering av Kystvegen og 45-minuttsregionen
• Støtte til dei prinsippvedtaka kommunane Flora, Bremanger og Vågsøy har bedt fylkeskommunen om i høve brukarfinansiering, regionbyggingspakke, bruk av ferjeavløysingsmidlar og oppstart av plan- arbeid i høve 45-minuttsregionen. Brev datert 11.05.09 vedlagt her
• At fylkespartiet set seg i førarsetet og sørgjer for ekstraordinære tiltak i høve samferdsle samt tilslutning blant dei andre partia fylket som fører fram til ei rask realisering av kystvegen og 45-minuttsregionen

Kalvåg 22.08.09

Med helsing

Flora Arbeidarparti v/ leiar Jan Helge Dale
Bremanger Arbeidarparti v/ leiar Aina A. Førde
Vågsøy Arbeidarparti v/ leiar Kristin Maurstad